མི་སེར་གྱི་ས་ཆ་ནང་ལུ་ཚུད་པའི་ གློག་མེའི་ཀཝ་དང་གློག་ཐག་ལས་བརྟེན་པའི་ བྱ་སྟབས་མ་བདེཝ་སེལ་ཐབས་ཀྱི་གྲོས་དོན།
ཁ་སྟོད་ལ་ཡག་འདེམས་ཁོངས་འཐུས་མི་གིས་ མི་སེར་གྱི་ས་ཆ་ནང་ལུ་ཚུད་པའི་ གློག་མེའི་ཀཝ་དང་ གློག་ཐག་ལས་བརྟེན་པའི་ བྱ་སྟབས་མ་བདེཝ་སེལ་ཐབས་འདི་ ད་རིས་ ཚོགས་ཁང་ནང་ལུ་ གྲོས་དོན་སྦེ་ཕུལ་ཡོདཔ་ཨིན།
དེ་ཡང་ འཐུས་མི་གིས་ གསལ་ཞུ་ཕུལ་མི་ནང་ལུ་ གློག་མེའི་རྒྱུན་ལམ་གྱི་དོན་ལུ་ གློག་ཐག་སྤྲིང་ནི་དང་ ཀཝ་ཚུ་ ས་ཁར་བརྡབ་འགྱོ་བའི་སྐབས་ སོ་ནམ་གྱི་ལཱ་འབད་ནི་ལུ་ ཐོག་རྐྱབ་མ་ཚད་ ལོ་ཐོག་ཚུ་ལུ་ཡང་ གནོད་པ་སྦོམ་སྦེ་ར་རྐྱབ་སྟེ་ མི་སེར་ སོ་ནམ་པ་ཚུ་ལུ་ དངུལ་འབྲེལ་གྱི་ གྱོང་རྒུད་ཕོག་དོ་ཡོདཔ་ཨིན་ཟེར་ཞུ་ཡི། དེ་གིས་ཡང་མ་ཚད་པར་ གནད་དོན་དེ་གིས་ མི་སྡེའི་ཨ་ལོ་འཁྱམ་ས་ལུ་ ཉེན་ཚུབས་ཆེ་བའི་གུ་ སོ་ནམ་པ་ཚུ་གི་ སྒོ་ནོར་སེམས་ཅན་ཚུ་ལུ་ཡང་ ཉེན་སྲུང་དང་འབྲེལ་བའི་ གདོང་ལེན་ཚུ་ བྱུང་སྟེ་ཡོད་ཟེར་ཞུ་ཡི།
འཐུས་མི་གིས་ དཀའ་ངལ་འདི་བསལ་ཐབས་ལུ་ གཤམ་གསལ་གྱི་ གྲོས་འདེབས་ཁག་གཉིས་ཕུལ་ཡི།
༡༽ མི་རློབས་མཱངམ་ཡོད་པའི་ས་ཁོངས་ནང་ གཞི་བཙུགས་འབད་ཡོད་པའི་ གློག་ཤུགས་ཀྱི་ ཀ་ཆེན་ཚུ་ ཉེན་སྲུང་ཅན་གྱི་ ས་ཁོངས་ཚུ་ནང་ སྤོ་བཤུད་འབད་དགོཔ།
༢༽ གཞུང་གིས་ ས་ཆ་སྤོ་བཤུད་འབད་མི་དང་ ས་ཚབ་སྤྲོད་ནི་ དེ་ལས་ ས་ཆ་སྤོ་བཤུད་མ་འབད་བའི་ སྒེར་གྱི་ས་ཆ་ཚུ་ བརྗེ་སོར་འབད་ནི་ལུ་ མ་དངུལ་ཚུ་ བགོ་བཀྲམ་འབད་དགོཔ།
དེ་ལས་ ཚོགས་ཁང་གིས་ གྲོས་འདེབས་གཉིསཔོ་འདི་གུ་ ཚོགས་དམངས་ལས་ ཕྱག་ཡར་སེང་གིས་ ངོས་ལེན་གནང་པའི་རྗེས་སུ་ རྒྱན་སྐྱུར་གནངམ་ད་ རྒྱན་སྐྱུར་ཚོགས་གྲལ་ འཐུས་མི་ཡོངས་བསྡོམས་ ༤༢ ཡོད་ས་ལས་ འཐུས་མི་ ༣༣ གྱིས་བཏུབ་དང་ ༣ གྱིས་མ་བཏུབ་ དེ་ལས་ ༦ གིས་འཛེམ་བཞུགས་རུང་ མང་མོས་ཐོག་ལས་ གྲོས་འདེབས་ཚུ་ ཆ་འཇོག་གྲུབ་གནང་ཡི།
དེ་གི་ཤུལ་ལས་ ཚོགས་ཁང་གིས་ ནུས་ཤུགས་དང་རང་བཞིན་ཐོན་སྐྱེད་བློན་པོ་གིས་ ཞུ་དོ་བཟུམ་སྦེ་ ཚོགས་ཐེངས་ཤུལ་མམ་ནང་ དེ་གི་གནས་ཚད་སྙན་ཞུ་ཅིག་ ཕུལ་དགོཔ་མ་ཚད་ ལོ་གཅིག་གི་རྒྱབ་ལས་ གྲོས་འདེབས་བསྟར་སྤྱོད་ཀྱི་ དང་ལེན་སྙན་ཞུ་ཕུལ་དགོཔ་སྦེ་ བཀའ་བསྐུལ་གནང་ཡོད་པའི་གནས་ཚུལ།
