རྒྱལ་ཡོངས་ཚོགས་འདུ་དེ་ གནམ་བྱཱར་དང་ དགུན་གྱི་ཚོགས་རིམ་ཟེར་ ལོ་རེའི་ནང་ཚོགས་ཐེངས་གཉིས་རེ་ འཚོགསཔ་ ཨིན་རུང་ འབྲུག་རྒྱལཔོ་གིས་བཀའ་གནང་པ་ཅིན་ དེ་ལས་ལྷག་སྟེ་ཡང་འཚོགས་ཆོག།

སྤྱི་ཚོགས་ཀྱི་ཚོགས་རིམ་སྒོ་འབྱེད་དང་ བཀར ཤིས་སྨོན་ལམ་མཛད་རིམ་ཚུ་ ཚོགས་ཁང་གཉིས་ཆ་རའི་འཐུས་མི་ཚུ་གིས་ འབྲུག་རྒྱལ་པོའི་ཕྱག་དབང་ལུ་ཐོན་པའི་ཤུལ་ལུ་ རྒྱལ་ཡོངས་ཚོགས་འདུའི་ཚོགས་ཁང་ཆེན་མོའི་ནང་སྦེ་གནངམ་ཨིན།

སྤྱིར་བཏང་ ཚོགས་ཐེངས་རེ་གིས་དུས་ཡུན་ཟླཝ་རེ་འགོརཝ་ཨིན་རུང་ དུས་ཡུན་གྱི་ཐད་ལུ་ གྲོས་གཞི་ལུ་རག་ལས་འོང་། དུས་རྒྱུན་ཚོགས་རིམ་ཚུ་ དྲོ་པའི་ཆུ་ཚོད་༡༠ ལས་དབུ་བཙུགས་གནང་སྟེ་ ཉིན་མའི་ཆུ་ཚོད་༡:༣༠ ལུ་ བར་མཚམས་ བཞག་གནངམ་ཨིན།

སྤྱི་ཚོགས་ཀྱི་བྱ་སྒོའི་རིམ་པ་ཚུ་ག་ར་ མི་མང་གིས་མཇལ་ཚུགསཔ་སྦེ་ རྒྱལ་ཡོངས་ཁ་སྐད་ རྫོང་ཁའི་ནང་ འགོ་འདྲེན་འཐབ་ཨིན།

ཚོགས་ཁང་གང་རུང་གིས་ཕུལ་བའི་ ཁྲིམས་ཡིག་ཅིག་དང་འབྲེལ་བའི་རྩོད་རྙོག་ཐོན་པའི་སྐབས་སུ་ སྤྱི་ཚོགས་ལྷན་བཞུགས་ འཚོགས་གནངམ་ཨིན། སྤྱི་ཚོགས་ལྷན་བཞུགས་དེ་ཡང་ རྒྱལ་ཡོངས་འདུའི་ཚོགས་དཔོན་གྱིས་ འགོ་འཁྲིད་འབད་ཐོག་ལས་ རྒྱལ་ཡོངས་ཚོགས་འདུའི་ཚོགས་ཁང་ཆེན་མོའི་ནང་སྦེ་འཚོགས་གནངམ་ཨིན། ནམ་རྒྱུན་རྩོད་རྙོག་ཚུ་ ཚོགས་ཁང་གཉིས་ཆ་རའི་ འཐུས་མི་ཚུ་ཡོད་པའི་ཚོགས་ཆུང་ཅིག་ བསྐོ་བཞག་གནང་ཐོག་ལས་དང་ སྤྱི་ཚོགས་ལྷན་བཞུགས་ཀྱི་ཚོགས་རིམ་སྐབས་སུ་ མཐའ་བཅད་ཚོགས་རྒྱན་བཙུགས་ཐོག་ལས་སེལཝ་ཨིན།