རྒྱལ་ཡོངས་ཚོགས་འདུའི་ བཙགས་འཐུའི་བྱ་རིམ་དེ་ཡང་ འགོ་ཐོག་བཙགས་འཐུ་དང་ སྤྱིར་བཏང་བཙགས་འཐུ་ཟེར་ སྐོར་ཐེངས་གཉིས་སྦེ་འགོ་འདྲེན་འཐབ་ཨིན། འབྲུག་གི་བཙགས་འཐུ་ལྷན་ཚོགས་དང་གཅིག་ཁར་ ཐོ་བཀོད་གྲུབ་པའི་ སྲིད་དོན་ཚོགས་པ་ཚུ་གིས་ འགོ་ཐོག་བཙགས་འཐུའི་ནང་དོ་འགྲན་འབདཝ་ཨིན། འགོ་ཐོག་བཙགས་འཐུའི་ནང་ ཚོགས་རྒྱན་མཐོ་ཤོས་དང་ མཐོ་ཤོས་གཉིས་པ་ཐོབ་མི་ སྲིད་དོན་ཚོགས་པ་གཉིས་ཀྱིས་ སྤྱིར་བཏང་བཙགས་འཐུའི་ནང་ དོ་འགྲན་འབདཝ་ཨིན། འདེམས་ཁྲི་མང་ཤོས་རྒྱལ་ཁ་ཐོབ་མི་སྲིད་ཚོགས་དེ་གིས་ གཞུང་གཞི་བཙུགས་འབདཝ་ཨིནམ་ད་ འདེམས་ཁྲི་ཉུང་སུ་རྒྱལ་ཁ་ཐོབ་མི་དེ་གིས་ ལྡོགས་ཕྱོགས་ཀྱི་སྡོད་ཁྲི་ལེནམ་ཨིན།