གཞུང་གིས་ ཤེས་རིག་གི་བཅའ་ཁྲིམས་བརྩམས་དགོ་པའི་ གྲོས་དོན་གྱི་ཆ་འཇོག།
དབྱིན་ཟླ་འདི་གི་ དབྱིན་ཚེས་ ༡༧ ལུ་ ལྷོ་ཐིམ་ཕུག་འདེམས་ཁོངས་ཀྱི་འཐུས་མི་གིས་ གཞུང་གིས་ ཤེས་རིག་གི་བཅའ་ཁྲིམས་བརྩམས་དགོ་པའི་ གྲོས་དོན་གཅིག་ཕུལ་ཡི། གྲོས་དོན་འདི་གུ་ གསུང་གྲོས་གནང་པའི་ཤུལ་ལུ་ ཚོགས་ཁང་གིས་ ཤེས་རིག་དང་རིག་རྩལ་གོང་འཕེལ་ལྷན་ཁག་གིས་ ཤེས་རིག་གི་སྲིད་བྱུས་གཅིག་ ཟིན་བྲིས་འབད་དེ་ རྒྱུས་གསལ་ཆེ་བའི་ཐུགས་ཐག་བཅད་ནིའི་དོན་ལུ་ ཚོགས་དམངས་ལུ་ཕུལ་དགོ་པའི་བཀའ་སྐུལ་གནང་ནུག།
ད་རིས་ཡང་ ལྷོ་ཐིམ་ཕུག་འདེམས་ཁོངས་ཀྱི་འཐུས་མི་གིས་ ཤེས་རིག་འདི་སྲིད་ཀྱི་དབང་ལུ་ཐལ་ནི་ལས་བཀག་ཐབས་དང་ ཤེས་རིག་གི་སྤུས་ཚད་དང་ཚད་གཞི་ཡར་དྲག་བཏང་ནི་གི་དོན་ལུ་ ཤེས་རིག་གི་དཔྱད་ཡིག་ཚོགས་དམངས་ལུ་ ཕུལ་དགོ་པའི་གྲོས་དོན་ཕུལ་ཡི།
དེ་དང་གཅིག་ཁར་ འཐུས་མི་གིས་ ཤེས་རིག་གི་སྲིད་བྱུས་ ཟིན་བྲིས་འཐབ་ཡོད་མི་འདི་གུ་ བསྐྱར་ཞིབ་དང་ཞིབ་འཚོལ་མཐར་ཕྱིནམ་འབད་དེ་ མི་དབང་དབང་མངའ་བདག་རིན་པོ་ཆེའི་ ཐུགས་འཆར་དང་བསྟུན་ ཤེས་རིག་དང་རིག་རྩལ་གོང་འཕེལ་ལྷན་ཁག་གིས་ སྲིད་བྱུས་འདི་གིས་ ཤེས་རིག་འདི་སྲིད་ཀྱི་དབང་ལུ་ཐལ་ནི་མེད་པའི་ ཐབས་ཤེས་ཚུ་སྒྲིགས་སྟེ་ བསྟར་སྤྱོད་འབད་དགོ་ཟེར་བའི་ གྲོས་དོན་བསྐྱར་བཟོ་འབད་དེ་ཕུལ་ཡོདཔ་ཨིན།
དེ་ལུ་ ཤེས་རིག་དང་རིག་རྩལ་གོང་འཕེལ་བློན་པོ་གིས་ ཚོགས་དམངས་ལུ་ཞུ་མི་ནང་ལུ་ ཤེས་རིག་གི་སྲིད་བྱུས་ཟིན་བྲིས་འདི་ཡང་ གཏིང་ཟབ་ཆེ་བའི་ཞིབ་འཚོལ་འབད་དེ་ བརྩམས་ཡོདཔ་དང་ སྲིད་བྱུས་འདི་གི་དོན་ལུ་ སློབ་གྲྭའི་སློབ་དཔོན་ཚུ་དང་ གྲོས་བསྟུན་འབད་འོང་ཟེར་ཨིན་པས། དགོས་མཁོ་དང་བསྟུན་ཏེ་ ཤེས་རིག་གི་དཔྱད་ཡིག་འདི་མ་འོངས་པ་ནང་ལུ་ གསུང་གྲོས་གནང་ནི་ལུ་ངོས་ལེན་ཡོདཔ་ཨིན་རུང་ སྐབས་ཐོབས་ཀྱི་དོན་ལུ་ ཟིན་བྲིས་འབད་ཡོད་པའི་ སྲིད་བྱུས་འདི་བསྟར་སྤྱོད་འབད་དོ་ཡོདཔ་དང་ གནད་དོན་ག་ཅི་རང་ཡོད་རུང་ སྲིད་བྱུས་འདི་གིས་སེལ་ཚུགས་ཟེར་བཤད་ཅི།
ཚོགས་ཞུགས་དེ་ཁར་ འཐུས་མི་ ༤༥ ཡོད་ས་ལས་ ག་ར་གིས་རྒྱབ་སྐྱོར་གནང་ཏེ་ གྲོས་དོན་འདི་ཡང་རྒྱན་སྐྱུར་གྱི་ཐོག་ལས་ ཆ་འཇོག་གྲུབ་ཡོད་པའི་གནས་ཚུལ།
