སྤྱི་ལོ་ ༢༠༢༤ སྤྱི་ཟླ་ ༡༡ པའི་ཚེས་ ༡༨ ལུ་ སོ་ནམ་དང་སྒོ་ནོར་བློན་པོ་དང་ གསོ་བའི་བློན་པོ་ དེ་ལས་ དངུལ་རྩིས་བློན་པོ་ཚུ་གིས་ ལོ་ཐོག་དང་སྒོ་ནོར་རྒུད་འཐུས་བློ་གཏད་མ་དངུལ་ གཞི་བཙུགས་འབད་ནིའི་སྐོར་ལས་ ཚོགས་ཐེངས་དང་པའི་གྲོས་ཆོད་ཚུ་གི་ ལས་རིམ་སྙན་ཞུ་ དེ་ལས་ གསོ་བའི་ཞབས་ཏོག་ཡར་དྲག་དང་ གཙོ་རིམ་གོང་འཕེལ་མ་དངུལ་གྱི་དགོས་མཁོ་ སྐོར་ལས་གསལ་ཞུ་ཕུལ་ཡི།

ལོ་ཐོག་དང་སྒོ་ནོར་རྒུད་འཐུས་བློ་གཏད་མ་དངུལ།

སོ་ནམ་དང་སྒོ་ནོར་བློན་པོ་གིས་ ཚོགས་ཐེངས་དང་པའི་ནང་ ལོ་ཐོག་དང་སྒོ་ནོར་རྒུད་འཐུས་བློ་གཏད་མ་དངུལ་ གཞི་བཙུགས་འབད་ནིའི་ གྲོས་དོན་ ཆ་འཇོག་གྲུབ་མི་ གྲོས་འདེབས་གུ་ སྙན་ཞུ་ཕུལ་ཡི།

བློན་པོ་གིས་ སྤྱི་ལོ་ ༢༠༡༦ ལས་ འདས་པའི་རྒུད་འཐུས་ཐབས་ལམ་བཟོ་ནི་ལུ་ བརྩོན་ཤུགས་བསྐྱེད་མི་ཚུ་ གཙོ་བོར་བསྟེན་ཡོདཔ་ད་ དེ་ནང་ མ་དངུལ་ ༼༢༠༡༧༽ དང་ ཉེན་བཅོལ་འཆར་གཞི་ ༼༢༠༢༡༽ གཞི་བཙུགས་འབད་ནི་གི་ དཔའ་བཅམ་རུང་ མཐར་འཁྱོལ་མ་བྱུངམ་ཨིན་པས། ཉམས་མྱོང་འདི་ཚུ་ལུ་གཞིར་བཞག་སྟེ་ ལྷན་ཁག་གིས་ རྒྱལ་ཡོངས་ལོ་ཐོག་དང་སྒོ་ནོར་ཉེན་བཅོལ་གྱི་ ལས་རིམ་ཅིག་ གྲོས་འཆར་བཀོད་ཡོདཔ་ད་ དེ་ནང་ གཞུང་གིས་ ཉེན་བཅོལ་གྱི་ བརྒྱ་ཆ་ ༥༠ དེ་ཅིག་ གྲོགས་རམ་འབད་ཡོདཔ་ཨིན་པས། གོང་ཚད་ཀྱི་ཕན་འདེབས་འདི་ གོང་ཚད་དང་འཁྲིལ་ཏེ་ བརྒྱ་ཆ་ ༢༠ ལས་ ༨༠ ཚུན་ སོ་སོར་སྦེ་འོང་ནི་ཨིན་པས།

ལྷན་ཁག་གིས་ དངུལ་རྩིས་ལྷན་ཁག་དང་ གྲོས་བསྟུན་འབད་དེ་ འཆར་གཞི་དེ་ ལེགས་བཅོས་འབད་ནིའི་དོན་ལུ་ འཕྲུལ་རིག་ལས་བྱེད་ཚོགས་ཆུང་ཅིག་ གཞི་བཙུགས་འབད་ཡོདཔ་ད་ འཆར་གཞི་དེ་ འཆར་དངུལ་ཆ་འཇོག་དང་འཁྲིལ་ སང་ཕོད་ལས་ ལག་ལེན་འཐབ་ནིའི་ འཆར་གཞི་ཡོདཔ་ཨིན་པས།

གྲོས་བསྟུན་གྱི་སྐབས་ལུ་ འཐུས་མི་ཚུ་གིས་ སོ་ནམ་པ་ཚུ་གི་དོན་ལུ་ ཁེ་སང་ཚུ་ ཐོབ་མ་ཚུགས་པའི་ ཚ་གྱས་ཡོད་ལུགས་ཚུ་ བཤད་དེ་ ཐབས་ཤེས་ཅིག་སྦེ་ བློ་གཏད་མ་དངུལ་གྱི་ གྲོས་འཆར་བཀོད་ནུག། ལ་ལུ་ཅིག་གིས་ ཁྱབ་ཚད་རྒྱ་སྐྱེད་འབད་དེ་ ཅ་ཆས་ཁ་སྐོང་དང་ ལ་ནོར་སེམས་ཅན་ཚུ་ བཙུགས་དགོ་པའི་ བསམ་འཆར་བཀོད་ནུག། བློན་པོ་གིས་ གྲོས་འཆར་བཀོད་མི་ འཆར་གཞི་དེ་གིས་ གཞུང་གི་རྒྱབ་སྐྱོར་དང་ སོ་ནམ་པ་ཚུ་གི་ ཕན་འདེབས་ཚུ་ འདྲ་མཉམ་བཟོ་ཚུགས་པའི་ ཁས་བླངས་འབད་ཡི།

ཚོགས་ཁང་གིས་ སྙན་ཞུ་དེ་ལུ་ ངོས་ལེན་འབད་དེ་ བློན་པོ་གིས་ དོན་ཚན་ ༧ འབད་མི་ལུ་ གཞིར་བཞག་སྟེ་ བློ་གཏད་མ་དངུལ་གྱི་ཐོག་ལས་ ཉེན་བཅོལ་གྱི་ གྲོས་འཆར་ཕུལ་མི་ལུ་ རྒྱབ་སྐྱོར་འབད་ཡི། གྲོས་ཆོད་དེ་ ཕྱག་ཡར་སེང་ཐོག་ལས་ ཆ་འཇོག་གྲུབ་ཡོདཔ་ད་ ཚོགས་ཐེངས་ནང་ འཐུས་མི་ ༤༠ ལས་ ༢༩ གིས་ རྒྱབ་སྐྱོར་འབད་ཡོདཔ་ཨིན་པས། བློན་པོ་ལུ་ གནམ་བྱཱར་གྱི་ ཚོགས་ཐེངས་སྐབས་ དང་ལེན་ཞིབ་ལྟས་སྙན་ཞུ་ཕུལ་དགོ་པའི་ བཀའ་རྒྱ་གནང་ཡི།

གསོ་བའི་ཞབས་ཏོག་ཡར་དྲག་གཏང་ནི།

གསོ་བའི་བློན་པོ་གིས་ ཚོགས་འདུ་གིས་ཆ་འཇོག་གྲུབ་མི་ གྲོས་ཆོད་ཚུ་དང་འཁྲིལ་ རྒྱལ་ཁབ་ནང་ གསོ་བའི་ཞབས་ཏོག་ཡར་དྲག་གཏང་ནིའི་དོན་ལུ་ རྒྱལ་ཡོངས་ཚོགས་འདུ་ལུ་ གྲོས་ཆོད་དང་ལེན་གྱི་སྙན་ཞུ་ཕུལ་ཡི། ལས་རིམ་གཙོ་བོ་ཚུ་ཡང་ གཞུང་སྐྱོང་དང་ཞབས་ཏོག་ཚུ་ ཡར་དྲག་གཏང་ཐབས་ལུ་ ལྷན་ཁག་གཞི་སྒྱུར་འབད་ནི་དང་ རྒྱལ་ཡོངས་གསོ་བའི་ཞབས་ཏོག་ གཅིག་སྒྲིལ་འབད་ནི་ རྫོང་ཁག་གསོ་བའི་འགོ་དཔོན་གྱི་ ལཱ་འགན་གསརཔ་བཟོ་ནི་ཚུ་ཨིན་པས། གསོ་བའི་འཕྲོད་བསྟེན་ལམ་ལུགས་གཅིག་སྒྲིལ་འབད་ནིའི་དོན་ལུ་ ནང་སྨན་ཞབས་ཏོག་ལས་ཁུངས་འདི་ སྔར་ག་ཨིནམ་བཟོ་ནི་ཨིནམ་ལས་ གཞི་སྒྱུར་བསྐྱར་ཞིབ་དེ་ རྒྱལ་གཞུང་ཞི་གཡོག་ལྷན་ཚོགས་ཀྱིས་ འབད་ནི་ཨིན་པའི་སྐོར་ལས་ ཚོགས་འདུ་གིས་ཤེས་རྟོགས་བྱུང་ཡི། 

ལྷན་ཁག་གིས་ ཉེར་མཁོའི་སྨན་རིགས་དང་ བཀྲམ་སྤེལ་འབྲེལ་མཐུད་སྙོམས་ཏོག་ཏོ་བཟོ་ནིའི་དོན་ལུ་ དམིགས་གཏད་ བརྒྱ་ཆ་ ༩༥ ལུ་བསྐྱེད་ཡོད་པའི་ཁར་ ལོ་ ༥ གི་འཆར་གཞི་ ༡༣ པའི་ནང་ བསམ་གྲུབ་ལྗོངས་མཁར་དང་ སྤ་རོ་ལུ་ ལུང་ཕྱོགས་སྨན་མཛོད་ཁང་ཚུ་ བཟོ་སྐྲུན་འབད་ནིའི་ འཆར་གཞི་ཡོདཔ་ཨིན་པས། ༼ORCs ༽ ཚུ་ ལོག་སྟེ་འགོ་བཙུགས་ཡོདཔ་ད་ གློ་བུར་སྨན་བཅོས་ཞབས་ཏོག་ཚུ་གི་དོན་ལུ་ མ་དངུལ་ལངམ་སྦེ་ཡོདཔ་ཨིན་པས། འཇིགས་མེད་རྡོ་རྗེ་དབང་ཕྱུག་རྒྱལ་ཡོངས་གཙོ་བསྟེན་སྨན་ཁང་ནང་ ནང་ཁོག་བརྟག་དཔྱད་འཕྲུལ་ཆས་ སི་ཊི་ ༼CT༽ དང་ ཨེམ་ཨར་ཨའི་ ༼MRI༽ འཕྲུལ་ཆས་ཁ་སྐོང་བཙུགས་ནིའི་ གྲོས་འཆར་ཚུ་ འཛམ་གླིང་གསོ་བའི་ཚོགས་སྡེ་ ༼WHO༽ དང་ རྒྱ་པཱན་གཞུང་དང་གཅིག་ཁར་ འབད་བའི་བསྒང་ཡོདཔ་ད་ ཅ་དམ་གྱི་གདོང་ལེན་ཡོད་རུང་ བསྐྱར་བཟོ་འབད་མི་ ཅ་ཆས་ཚུ་ ལག་ལེན་འཐབ་ནིའི་ བསམ་ཞིབ་འབད་དོ་ཡོདཔ་ཨིན་པས། གློ་བུར་ལས་ཁུངས་ནང་ མི་སྤུང་འཛོམས་ཀྱི་དཀའ་ངལ་ བསལ་ཐབས་ལུ་ ཉལ་ཁྲི་གསརཔ་ ༣༦ དང་ སྨན་གཡོགམོ་ཁ་སྐོང་བཙུགས་ཡོདཔ་མ་ཚད་ མི་དབང་རྒྱལ་ཡུམ་མཆོག་གི་ རྒྱབ་སྐྱོར་ཐོག་ལས་ མཐའ་མའི་སྨན་ཁང་ཅིག་ བཟོ་བའི་བསྒང་ཡོདཔ་ཨིན་པས།

གྲོས་བསྟུན་སྐབས་ འཐུས་མི་ཚུ་གིས་ ལྷན་ཁག་གི་ ཕྱག་ལཱ་ཚུ་ལུ་ ཡིད་ཆེས་བསྐྱེདཔ་ད་གཅིག་ཁར་ དུས་ཐེབས་ཀྱི་འཐུས་དང་ འགྲུལ་སྐྱོད་འཐུས་ དེ་ལས་ Outreach Clinic ཞབས་ཏོག་ཡར་དྲག་གཏང་ནི་ དེ་ལས་ གསོ་བའི་ལས་བྱེདཔ་ཚུ་གི་དོན་ལུ་ ངལ་སངས་ཀྱི་མཐུན་རྐྱེན་ཚུ་ ལེགས་ཤོམ་བཟོ་ནིའི་སྐོར་ལས་ ཚ་གྱས་ཚུ་བཤད་ཅི། དེ་མ་ཚད་ བཟའ་འཐུང་ཉེན་སྲུང་གི་ ཐབས་ལམ་ཚུ་ སྒྲིང་སྒྲི་བཟོ་དགོཔ་དང་ ལས་བྱེདཔ་ཚུ་གི་ དགོངས་ཞུ་མར་ཕབ་འབད་ནིའི་དོན་ལུ་ འགན་འཁྲི་གསལ་ཏོག་ཏོ་བཟོ་དགོཔ་སྦེ་ཞུ་ཡི། བློན་པོ་གིས་ འཛམ་གླིང་གསོ་བའི་ཉིནམ་ལུ་ གསོ་བའི་ལས་བྱེདཔ་ཚུ་ སེམས་ཤུགས་བྱིན་ནིའི་དོན་ལུ་ ངོས་འཛིན་འབད་ནི་ཨིནམ་མ་ཚད་ འཇིགས་མེད་རྡོ་རྗེ་དབང་ཕྱུག་ རྒྱལ་ཡོངས་གཙོ་བསྟེན་སྨན་ཁང་ནང་ལུ་ བཟའ་ཁང་དང་ ལུས་རྩལ་ཁང་ཚུ་རྩིས་ཏེ་ དགོས་མཁོའི་མཐུན་རྐྱེན་ཚུ་ ཡར་དྲག་གཏང་ནི་ལུ་ བརྩོན་ཤུགས་བསྐྱེད་བཞིན་ཡོད་མི་དེ་ འཕྲོ་མཐུད་དེ་ར་ ཕྱག་ཞུ་ནིའི་ཁས་བླངས་ཕུལ་ཡི།

ཚོགས་ཁང་གིས་ ལྷན་ཁག་གི་སྙན་ཞུ་དེ་ལུ་ ངོས་ལེན་མཛད་པའི་ཁར་ འཕྲོ་མཐུད་ཀྱི་ལཱ་ཚུ་ལུ་ རྒྱབ་སྐྱོར་མཛད་ཅི།

གཙོ་རིམ་གོང་འཕེལ་མ་དངུལ་གྱི་ བརྟག་ཞིབ་སྙན་ཞུ།

སྤྱི་ལོ་ ༢༠༢༤ སྤྱི་ཟླ་ ༧ པའི་ནང་ རྒྱལ་ཡོངས་ཚོགས་འདུ་གིས་ གྲོས་འདེབས་ཆ་འཇོག་འབད་བའི་ཤུལ་ལས་ དངུལ་རྩིས་བློན་པོ་གིས་ ད་རེས་ གཙོ་རིམ་གོང་འཕེལ་མ་དངུལ་སྦེ་ གྲོས་འཆར་བཀོད་མི་ འདེམས་ཁོངས་གོང་འཕེལ་གནང་སྦྱིན་མ་དངུལ་དེ་ ལོག་སྟེ་ འགོ་བཙུགས་དགོ་པའི་ གྲོས་འཆར་ལུ་ བསྐྱར་ཞིབ་ཀྱི་སྙན་ཞུ་ཅིག་ ཕུལ་ཡོདཔ་ཨིན་པས། བློན་པོ་གིས་ གོང་འཕེལ་མ་དངུལ་ཆ་འཇོག་དང་ བལྟ་རྟོག་གཉིས་ཆ་རའི་ནང་ འཐུས་མི་ཚུ་གིས་ འབྲེལ་གཏོགས་འབད་ནི་དང་ ས་གནས་གཞུང་ནང་ ལྕོགས་གྲུབ་ཀྱི་ཁྱད་པར་ དེ་ལས་ མ་དངུལ་འདྲ་མཉམ་མེད་པའི་ ཉེན་ཁ་ཚུ་རྩིས་ཏེ་ རྩ་ཁྲིམས་ཆེན་མོའི་ དགོངས་དོན་གྱི་དོན་ཚན་དག་པ་ཅིག་ར་ཕུལ་ཡི། བསྐྱར་ཞིབ་འདི་གིས་ ཧེ་མ་ འདེམས་ཁོངས་གོང་འཕེལ་གནང་སྦྱིན་ མ་དངུལ་གྱི་ལམ་སྟོན་ལུ་ མ་གནས་མི་དང་ བཙག་འཐུའི་ནང་ བར་འཛུལ་འབད་ནི་གི་ འོས་འབབ་ཡོདཔ་ལས་ མི་མང་གི་བློ་གཏད་འདི་ བྱ་རིམ་ནང་ལུ་ ཉམས་བཅུག་ནི་གི་ འོས་འབབ་ཡོདཔ་སྦེ་ གསལ་བཀོད་འབད་ནུག། དངུལ་རྩིས་ལྷན་ཁག་གིས་ པི་ཌི་ཨེཕ་ ༼PDF༽ སོ་སོར་ཅིག་ བཟོ་ནི་མེན་པར་ ད་ལྟོ་ཡོད་པའི་ ཐོན་ཁུངས་བགོ་བཀྲམ་གྱི་ཐབས་གཞི་ ༼Resource Allocation Formula༽ དང་ ལོ་ལྟར་གནང་སྦྱིན་མ་དངུལ་གྱི་ ལམ་ལུགས་ཚུ་ ལག་ལེན་འཐབ་དགོཔ་སྦེ་ གྲོས་འཆར་བཀོད་ཡོདཔ་ཨིན་པས།

གྲོས་བསྟུན་སྐབས་ལུ་ འཐུས་མི་ཚུ་གིས་ གསལ་བཀོད་འབད་མི་ནང་ སྙན་ཞུ་འདི་ ཚོགས་ཐེངས་དང་པའི་གྲོས་ཆོད་དང་མ་མཐུནམ་སྦེ་བཀོད་ཡོདཔ་དང་ ལྷན་ཁག་གིས་ ལས་སྣ་ཚུ་ བགོ་བཀྲམ་དང་ བསྐྱར་ཞིབ་ལག་ལེན་འཐབ་ནི་དང་ བལྟ་རྟོག་དེ་ལས་ བརྟག་ཞིབ་འབད་ནིའི་དོན་ལུ་ ལམ་སྟོན་བཟོ་དགོཔ་སྦེ་ ཞུ་བ་འབད་ཡོདཔ་ཨིན་པས། དེ་ལས་ ལས་རིམ་ཚུ་ ལག་ལེན་འཐབ་ཐངས་ཀྱི་ གོང་འཕེལ་གྱི་སྐོར་ལས་ སྙན་ཞུ་འབད་ནི་དང་ གཙོ་རིམ་གོང་འཕེལ་མ་དངུལ་དེ་ ཁེ་ཕན་མཐོ་ཤོས་ཐོབ་ཐབས་ལུ་ ལག་ལེན་འཐབ་དགོ་པའི་ ས་ཁོངས་ཚུ་ ཚད་འཛིན་བཟོ་ནི་དང་ སྔོན་འགྲོའི་ཞལ་འཛོམས་ནང་ བཀོད་དགོཔ་སྦེ་ཨིན་པས།

ཚོགས་ཁང་གིས་ གྲོས་དོན་གྱི་གྲོས་ཆོད་ཚུ་ དངུལ་རྩིས་ལྷན་ཁག་གིས་ བསྟར་སྤྱོད་མ་འབད་བར་ཡོདཔ་ལས་ འབྲུག་གི་རྒྱལ་ཡོངས་ཚོགས་འདུའི་ བྱ་བའི་གནད་སྤྱོད་ ༢༠༢༢ ཅན་མའི་ དོན་ཚན་ ༡༠༣ པ་དང་འཁྲིལ་ ཤུལ་མའི་ཚོགས་ཐེངས་ཚུ་ནང་ འཕྲོ་མཐུད་དེ་ དང་ལེན་ཞིབ་ལྟས་འབད་ནི་སྦེ་ གྲོས་ཐག་བཅད་གནང་ཡི། གལ་སྲིད་ ཁྲིམས་འབྲེལ་གྱི་དོགས་པ་རེ་ཡོད་པ་ཅིན་ ཚོགས་ཁང་གིས་ འབྲུག་གི་རྩ་ཁྲིམས་ཆེན་མོའི་དགོངས་དོན་དང་འཁྲིལ་ རྩོད་དཔོན་ཡོངས་ཁྱབ་ཀྱི་ བསམ་འཆར་ཚུ་ཡང་ ཞུ་ཆོགཔ་སྦེ་ ཡོདཔ་ཨིན་པའི་དོགས་སེལ་ཚུ་གནང་ཡོདཔ་ཨིན།