ད་རིས་ ཚོགས་ཁང་གིས་ དཔལ་འབྱོར་དང་དངུལ་རྩིས་ཚོགས་ཆུང་གིས་ཕུལ་ཡོད་མི་ ལོ་ལྔའི་འཆར་གཞི་ ༡༣ པའི་ གྲོས་འདེབས་གུ་ གསུང་གྲོས་འཕྲོ་མཐུད་དེ་གནང་ཡོདཔ་ཨིན།

དམིགས་བསལ་གྱི་གྲོས་འདེབས་དགུ་དང་ སྤྱིར་བཏང་གི་གྲོས་འདེབས་གཅིག་གུ་ གྲོས་བསྡུར་གནང་སྟེ་  དཔལ་འབྱོར་དང་དངུལ་རྩིས་ཚོགས་ཆུང་གིས་ གྲོས་འདེབས་ཕུལ་མི་ཚུ་ གཤམ་གསལ་ལྟར་ ངོས་ལེན་མཛད་དེ་ ཚོགས་དམངས་ཀྱིས་ ལོ་ལྔའི་འཆར་གཞི་ ༡༣ པ་འདི་ ཆ་འཇོག་གནང་ཡི།

༡༽ གྲོས་འདེབས་ གཉིས་པ། ཐོན་སྐྱེད་བགོ་བཀྲམ་ཐབས་གཞི་གི་དོན་ལུ་ ས་གནས་འདི་ནང་སྡོད་མི་གི་ དཔྱ་སྙོམས་ཀྱི་མི་རློབས་གྲངས་རྩིས་དང་ ས་གནས་འདི་ནང་ གནས་སྐབས་ཀྱི་དོན་ལུ་སྡོད་པའི་མི་རློབས་ཀྱི་ཐོ་གི་ཚབ་ལུ་ ས་གནས་འདི་ཁར་ཐོ་བཀོད་གྲུབ་པའི་མི་རློབས་ཀྱི་ཐོ་ལག་ལེན་འཐབ་དགོ།

༢༽གྲོས་འདེབས་ གསུམ་པ། ས་གནས་ས་ཁོངས་ཀྱི་འཆར་གཞི་ ཆ་འཇོག་གྲུབ་མི་དང་བསྟུན་ རྫོང་ཁག་ཁྲོམ་སྡེ་དང་ཡན་ལག་ཁྲོམ་སྡེ་ཚུ་གི་ ཐོན་སྐྱེད་བགོ་བཀྲམ་འདི་ཡང་ སོ་སོར་སྦེ་འབད་དགོ།

༣༽ གྲོས་འདེབས་ བཞི་པ། ཁྲིམས་བཟོ་དང་བསྟར་སྤྱོད་འབད་མི་གིས་ ཐོན་སྐྱེད་དཔྱ་བགོ་དང་ མ་འོངས་ཐོན་སྐྱེད་དགོས་མཁོ་ཚོད་དཔག་ལྷན་ཐབས་འབྱུང་ནི་ཨིནམ་ལས་ ལས་ཁུངས་ཁག་གི་ཐོན་སྐྱེད་༼འཆར་དངུལ༽དཔྱ་བགོའི་ཡིག་ཆས་འདི་ཡང་ རྩིས་ལོ་ ༢༠༢༤-༢༠༢༥ གི་ རྒྱལ་ཡོངས་འཆར་དངུལ་གྱི་ ཡིག་ཆས་ནང་ལུ་འཁོད་དེ་ཡོདཔ་བཟུམ་སྦེ་བཟོ་དགོཔ། 

༤༽ གྲོས་འདེབས་ དྲུག་པ། ལས་འགུལ་ཆེ་བ་ཚུའི་ བསྟར་སྤྱོད་འབད་ནི་ དེ་གི་དྭངས་གསལ་ དེ་ལས་ཚོད་དཔག་འབད་ནི་དང་ ལས་འགུལ་འདི་ རིམ་མཐུན་སྦེ་འགྲུབ་ཐབས་ལུ་ འཆར་གཞི་ནང་ལུ་ འཆར་དངུལ་དང་ཐོན་སྐྱེད་གྱི་བརྡ་སྟོན་ཚུ་ཡང་སྒྲིགས་དགོ།

༥༽ གྲོས་འདེབས་ བདུན་པ། གཞུང་གིས་ ནང་འཁོད་ཐོན་སྐྱེད་ཡོངས་འབོར་ལས་ བརྒྱ་ཆ་ ༡  འདི་ཞིབ་འཚོལ་དང་ གོང་འཕེལ་གྱི་དོན་ལུ་དཔྱ་བགོ་འབད་དགོཔ་དང་ དེ་ཡང་ ཞིབ་འཚོལ་གཞི་རྟེན་དང་ ཁུངས་ལྡན་ཞིབ་འཚོལ་ དེ་ལས་ བརྟག་ཞིབ་གོང་འཕེལ་དོན་ལུ་བཞག་དགོ།

༦༽ གྲོས་འདེབས་ བརྒྱད་པ་། གཞུང་གིས་ ལོ་ལྔའི་ འཆར་གཞི་ ༡༣ པའི་ནང་ ཁ་གསལ་གྱི་ མི་སྟོབས་གོང་འཕེལ་ འཆར་གཞི་ཨམ་དང་གཅིག་ཁར་ བརྩོན་ཤུགས་ཅན་གྱི་ཐོན་སྐྱེད་ བཀོ་བཀྲམ་ འབད་ནི་དང་  མི་སྟོབས་གོང་འཕེལ་ ཡར་རྒྱས་གཏང་ནི་ལུ་ དངུལ་ཀྲམ་ཐེར་འབུམ་ ༢ ལས་ བརྒྱ་ཆ་ ༠.༨༡ དང་ དངུལ་ཀྲམ་ ཐེར་འབུམ་ ༤.༩ ལས་ བརྒྱ་ཆ ༢ གཏང་དགོ།

༧༽ གྲོས་འདེབས་ དགུ་པ། ལཱ་གཡོག་མེད་མི་དང་ སློབ་གྲྭ་ལས་ཐོན་སྡོད་མི་ ན་གཞོན་ཚུའི་དོན་ལུ་ རྩེད་རིགས་ཀྱི་མཐུན་རྐྱེན་གོང་འཕེལ་གྱི་དོན་ལུ་ གཞུང་གིས་ གཏན་རྩའི་ཐོན་སྐྱེད་དཔྱ་དགོ་འབད་དགོ།

༨༽ གྲོས་འདེབས་ བཅུ་པ། འབྲུག་གི་རྩ་ཁྲིམས་ཆེན་མོའི་ རྩ་ཚན་ ༡༤ པའི་དོན་ཚན་ ༢ པ་དང་འཁྲིལ་ གཞུང་གིས་ དཔལ་འབྱོར་ལྷན་ཐབས་མ་དངུལ་འདི་ དྭངས་གསལ་ འགན་ཁུར་ཅན་དང་ འགན་འཁྲི་གི་དོན་ལུ་ ལོ་ལྔའི་འཆར་གཞི་ ༡༣ པའི་ དངུལ་འབྲེལ་ གཞི་བཀོད་ནང་བཙུགས་དགོ།

གྲོས་འདེབས་ དང་པ་འདི་ཡང་ རྒེད་འོག་དང་ རྫོང་ཁག་ དེ་ལས་ ཁྲོམ་སྡེ་ནང་ལུ་ ཚད་གཞི་གཅིག་མཚུངས་བཟོ་སྟེ་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་ ཚད་འཛིན་ ༼ལོག་ཕྱོགས་༽ མར་ཕབ་འབད་ནི་དང་ ཚད་འཇལ་ཐབས་གཞི་འདི་ རྒེད་འོག་ནང་བཟུམ་སྦེ་ ལག་ལེན་འཐབ་ནི། དེ་ལས་ ཐོན་སྐྱེད་བགོ་བཀྲམ་གྱི་ཐབས་གཞི་ འབད་བའི་སྐབས་ ཚད་ལྡན་ལོག་སྒྱུར་ལག་ལེན་འཐབ་ནི་འདི་ མ་དགོཔ་བཟོ་ནི། དེ་ལས་ གྲོས་འདེབས་ ༥  ས་གནས་གཞུང་ལུ་  ལས་འགུལ་གྱི་རྣམ་པ་ PTA  དང་  གོང་འཕེལ་ཆུང་བའི་ལས་འགུལ་ SDP ཐོན་སྐྱེད་ བགོ་བཀྲམ་འདི་ གནང་སྦྱིན་གྱི་མ་དངུལ་ བགོ་བཀྲམ་འབད་དོ་བཟུམ་སྦེ་ བཀོ་བཀྲམ་འབད་དགོ་ཟེར་མི་འདི་ ཕྱག་ཡར་སེང་ཐོག་ལས་ མང་མོས་ཀྱིས་ རྒྱབ་སྐྱོར་ཐོབ་སྟེ་འདུག།

དེ་ལས་ ཚོགས་དམངས་ལས་ ངོས་ལེན་ ཡོད་མེད་ རྒྱན་སྐྱུར་ཐོག་ལས་གཟིགསཔ་ད་ རྒྱན་སྐྱུར་འཐུས་མི་ཡོངས་བསྡོམས་ ༤༢ ཡོད་ས་ ལས་ འཐུས་མི་ ༣༨ ཀྱིས་་བཏུབ་དང་ འཐུས་མི་ ༣ གྱི་མི་བཏུབ་ དེ་ལས་ འཐུས་མི་ ༡  ཀྱིས་འཛེམས་བཞུགས་རུང་ མང་མོས་ ཐོག་ལས་ ལོ་ལྔའི་ འཆར་གཞི་ ༡༣ པའི་གུར་ ཆ་སྦྱོར་གནང་ཡོད་པའི་གནས་ཚུལ།